ព្រះរាជពិធីបុណ្យអុំទូក បណ្តែតប្រទីប សំពះព្រះខែនិងអកអំបុកនៅឆ្នាំនេះនឹងត្រូវប្រារព្ធ
ឡើងក្នុងរយៈពេល ៣ថ្ងៃចាប់ពីថ្ងៃទី ២០ ដល់ថ្ងៃទី ២២ ខែវិច្ឆិកា ឆ្នាំ ២០១០។
បើយោងទៅតាមគណៈកម្មាធិការរៀបចំបុណ្យជាតិ និងអន្តរជាតិ បានឲ្យដឹងថា នៅឆ្នាំនេះ
មានទូកងសរុបចំនួន ៤២០ទូក និងកីឡាករសរុបចំនួន ២៧ ៥៧០នាក់ គិតត្រឹមថ្ងៃទី១០
ខែវិច្ឆិកា ឆ្នាំ២០១០ ដែលជាថ្ងៃចុងក្រោយនៃការចុះបញ្ជីទូកងដែលនឹងត្រូវធ្វើការប្រលង
ប្រណាំងនៅឆ្នាំនេះ។ ក្នុងចំណោមទូកងទាំង ៤២០ទូក មានទូកអុំបុរសចំនួន ២៥៨,
ទូកអុំនារី ១, ទូកចែវបុរស ៤៤, ទូកចែវនារី ២, ទូកងខ្នាតអន្តរជាតិ ផ្នែកបុរសចំនួន ១១៣
និងទូកងខ្នាតអន្តរជាតិ ផ្នែកនារីចំនួន ២។ ចំពោះចំនួនកីឡាករអុំទូកបុរសមាន ២២ ០២៥នាក់
និងកីឡាករអុំទូកនារីមាន ១១៨នាក់ បម្រុងចំនួន ៥ ៤២៧នាក់។
តាមតួលេខក្នុងតារាងខាងលើបានបង្ហាញថា ចំនួនទូកង កីឡាករ និងប្រទីបមានការកើន
ឡើងបើធៀបនឹងឆ្នាំ ២០០៩។ គួរកត់សំគាល់ថា ជាធម្មតាមានតែប្រទីបចំនួន ៨ ទេដែល
នឹងត្រូវបណ្តែតក្នុងព្រះរាជពិធីបុណ្យ តែដោយឡែកនៅឆ្នាំ២០១០នេះ សាលារាជធានី
ភ្នំពេញក៏បានបង្កើតប្រទីបមួយបន្ថែមទៀត ដើម្បីចូលរូមអបអរផងដែរ។
ទាក់ទិននឹងសន្តិសុខ សណ្តាប់ធ្នាប់មានការរឹតបន្តឹងជាងមុន ដើម្បីធានាឲ្យបាននួវសន្តិសុខ
សុវត្ថិភាពជូនភ្ញៀវជាតិ ភ្ញៀវអន្តរជាតិ និងថ្នាក់ដឹកនាំគ្រប់លំដាប់ថ្នាក់ក្នុងព្រះរាជពិធីបុណ្យ
នេះ។ បើតាមប្រសាសន៍របស់ លោក ទូច ណារ៉ុថ បានឲ្យដឹងថា ក្នុងពិធីបុណ្យអំទូកនេះ
កងកម្លាំងសមត្ថកិច្ចមកពីស្ថាប័នដែលពាក់ព័ន្ធមានដូចជា មន្រ្តីកងរាជអាវុធហត្ថ ប៉ូលីស
ក្រសួងមហាផ្ទៃ និងប៉ូលីសនៅតាមខណ្ឌទាំង ៨ រាប់ម៉ឺននាក់នឹងដាក់ពង្រាយគ្រប់ច្រកល្ហក
តាមផ្លូវចេញចូល និងនៅជុំវិញខ្សែក្រវ៉ាត់ក្រុង។ ក្នុងនោះ លោក ពង្ស សាវរិទ្ធ មេបញ្ជាការរងកងរាជអាវុធហត្ថក្រុងភ្នំពេញក៏បានបញ្ជាក់ពីចំនួនកងកម្លាំងរាជអាវុធហត្ថថានឹងមានចំនួន
ប្រហែលជាជិត ៥០០០នាក់ ដែលមានក្រុមអន្តរាគមន៍ ប្រចាំការនៅច្រកចេញចូលភ្នំពេញ
ទាំង ៧ច្រក និងក្រុមគាំទ្រពីចម្ងាយ ប្រចាំការនៅច្រកផ្លូវជាតិលេខ១, ផ្លូវជាតិលេខ ២,
ផ្លូវជាតិលេខ ៣, ផ្លូវជាតិលេខ ៤, និងនៅតាមខ្សែក្រវាត់ក្រុង។
ចំណែកឯ ក្រសួងធម្មាការ និងសាសនាក៏បានចេញបម្រាម ហាមមិនឲ្យព្រះសង្ឃនិមន្តដោយ
សេរីនៅក្នុងពិធីបុណ្យអំទូកនេះដែរ ដើម្បីបញ្ជៀសនូវទង្វើអសីលធម៌ណាមួយជាយថា
ហេតុ ក្នុងគោលបំណងលើកស្ទួយក្រមសីលធម៌ព្រះសង្ឃ និងវិស័យព្រះពុទ្ធសាសនា។
គួររំលឹកផងដែរថា ព្រះរាជពិធីបុណ្យអុំទូកប្រារព្ធឡើងក្នុងគោលបំណងសំខាន់ពីរគឺ៖
១. រលឹកដល់ជ័យជម្នះរបស់កងទ័ពជើងទឹកកម្ពុជានាសម័យបុរាណ
២. រលឹកដល់គុណបុណ្យព្រះចង្កូមកែវ និងព្រះគង្គារ។
Filed under: ពត៌មានជាតិ:national news | Tagged: ទូកង, បណ្តែតប្រទីប, បុណ្យអុំទូក, សំពះព្រះខែ, អកអំបុក | Leave a comment »
ចំណីគំនិត 